నిరుద్యోగ యువతకు గొప్ప అవకాశం

కోదాడలో మెగా జాబ్ మేళాను విజయవంతం చేయాలి: కాంగ్రెస్ నాయకులు డాక్టర్ ఊర రామ్మూర్తి యాదవ్

నిరుద్యోగ యువతకు ఉద్యోగ అవకాశాలు కల్పించాలనే ఉద్దేశంతో కోదాడలో నిర్వహించనున్న మెగా జాబ్ మేళాను యువత సద్వినియోగం చేసుకోవాలని కాంగ్రెస్ నాయకులు డాక్టర్ ఊర రామ్మూర్తి యాదవ్ పిలుపునిచ్చారు. ఈ సందర్భంగా ఆయన మాట్లాడుతూ, నేటి పోటీ ప్రపంచంలో విద్యార్హతలతో పాటు నైపుణ్యాలు, కమ్యూనికేషన్ స్కిల్స్ ఎంతో అవసరమని అన్నారు. ఉద్యోగాల కోసం ఎదురుచూస్తున్న యువతకు ఒకే వేదికపై వివిధ ప్రముఖ సంస్థల్లో ఉపాధి అవకాశాలు అందుబాటులోకి రావడం మంచి అవకాశమని పేర్కొన్నారు. నిరుద్యోగ యువత తమ విద్యార్హతలకు అనుగుణంగా అందుబాటులో ఉన్న ఉద్యోగాలను ఎంపిక చేసుకుని, జాబ్ మేళాలో పాల్గొని ఈ అవకాశాన్ని సద్వినియోగం చేసుకోవాలని కోరారు. గ్రామీణ ప్రాంతాల యువత కూడా పెద్ద సంఖ్యలో పాల్గొని తమ ప్రతిభను చాటుకోవాలని సూచించారు. యువతలో ఉన్న ప్రతిభకు సరైన అవకాశాలు లభిస్తే వారు స్వయం అభివృద్ధితో పాటు కుటుంబ ఆర్థిక స్థితిని మెరుగుపరుచుకుని సమాజ అభివృద్ధికి తోడ్పడగలరని డాక్టర్ ఊర రామ్మూర్తి యాదవ్ అన్నారు. కోదాడలో నిర్వహించే ఈ మెగా జాబ్ మేళాకు నిరుద్యోగ యువత, విద్యార్థులు, యువజన సంఘాల ప్రతినిధులు పెద్ద సంఖ్యలో హాజరై విజయవంతం చేయాలని ఆయన కోరారు.