పిర్యాదుల పట్లా వాస్తవాలను పరిశీలించి త్వరగా పరిష్కరించాలి:-జిల్లా ఎస్పీ టి శ్రీనివాస రావు

జోగులాంబ గద్వాల 30 సెప్టెంబర్ 2024 తెలంగాణ వార్త ప్రతినిధి:-గద్వాల పిర్యాదుల పట్లా వాస్తవాలను పరిశీలించి త్వరగా పరిష్కరించాలని జిల్లా ఎస్పీ టి శ్రీనివాస రావు పోలీస్ అధికారులను ఆదేశించారు. సోమవారం జిల్లా పోలీసు కార్యాలయంలో  నిర్వహించిన  ప్రజావాణి కార్యక్రమంలో భాగంగా   జిల్లాలోని వివిధ ప్రాంతాల నుండి వచ్చిన దాదాపు 11 మంది అర్జీదారులతో నేరుగా  మాట్లాడి వారి సమస్యలను తెలుసుకొని సంబంధిత పోలీసు అధికారులతో ఫోన్ లో మాట్లాడి పూర్తి వివరాలు సమర్పించాలని ఆదేశించారు. భూ సమస్యలు, ప్లాట్స్ కబ్జా, ఇతర అంశాల పై పిర్యాదులు రావడం జరిగిందని ఎస్పీ తెలిపారు. ఈ సందర్భంగా ఎస్పీ మాట్లాడుతూ ప్రజలకు పోలీస్ శాఖను మరింత చేరువ చేయడం లక్ష్యంగా ప్రజా సమస్యలను పరిష్కరించే విధంగా కృషి చేస్తున్నామని అన్నారు. పోలీస్ స్టేషన్ కి వచ్చిన  ఫిర్యాదుదారులతో మర్యాదగా మాట్లాడి పిర్యాదులు స్వీకరించి సంబంధిత ఫిర్యాదులపై క్షేత్ర స్థాయిలో పరిశీలించి వేగంగా స్పందించి బాధితులకు న్యాయం జరిగే విధంగా చూడాలని, ఫిర్యాదుదారునికి భరోసా, నమ్మకం కలిగించేలా పని విధానం ఉండాలన్నారు. అలాగే  చట్టవ్యతిరకమైన చర్యలు చేస్తూ శాంతి భద్రతలకు భంగం కలిగించే వారి పట్ల కఠినంగా వ్యవహరించాలని జిల్లా ఎస్పీ పోలీసు అధికారులను ఆదేశించారు.