తెలంగాణ సీఎం రేవంత్ రెడ్డిని ఢిల్లీలో కలిసిన అభిషేక్ మను సింఘ్వీ

కాంగ్రెస్ పార్టీ ప్రముఖ నేత, ప్రముఖ న్యాయవాది అభిషేక్ సింఘ్వీ నేడు తెలంగాణ ముఖ్యమంత్రి రేవంత్ రెడ్డిని కలిశారు. ఈ సమావేశం రాజకీయ వర్గాల్లో ఆసక్తి రేపుతోంది. తెలంగాణ రాష్ట్రం నుంచి రాజ్యసభకు భారాస పార్టీ తరఫున ప్రాతినిధ్యం వహించిన కే. కేశవ రావు ఇటీవల తన పదవికి రాజీనామా చేశారు. ఆయన తన పదవికి రాజీనామా చేసి కాంగ్రెస్ పార్టీలో చేరారు. ఈ క్రమంలో, ఆయన ఖాళీ చేసిన రాజ్యసభ స్థానానికి అభిషేక్ సింఘ్వీ పేరు తెరపైకి వచ్చింది. కాంగ్రెస్ పార్టీ అధిష్ఠానం అభిషేక్ సింఘ్వీని ఆ స్థానంలోకి పంపాలని భావిస్తుండటంతో, ఆయన ముఖ్యమంత్రి రేవంత్ రెడ్డిని కలిసారు. ఇక్కడ ఆసక్తికర అంశం ఏమిటంటే, తెలంగాణలోని కాంగ్రెస్ పార్టీకి చెందిన కొంతమంది నేతలు ఈసారి రాజ్యసభకు తెలంగాణకు చెందిన వ్యక్తిని ఎంపిక చేయాలని కోరుతున్నారు. అభిషేక్ సింఘ్వీ హోదా, ఆయన నైపుణ్యం పట్ల ఎలాంటి సందేహం లేకపోయినా, స్థానిక నాయకత్వానికి ప్రాధాన్యత ఇవ్వాలని ఈ వర్గం భావిస్తోంది. తెలంగాణ కాంగ్రెస్ లోని కొందరు నేతలు, ఈ విషయం పై తమ అభిప్రాయాలను పార్టీ అధిష్ఠానానికి తెలిపారు.