ఎస్సీ సాంఘిక సంక్షేమ శాఖ హాస్టళ్లలో నెలకొన్న సమస్యలను వెంటనే పరిష్కరించాలి – దరఖాస్తు చేసుకున్న ప్రతి అర్హ విద్యార్థికి హాస్టల్ సీటు కల్పించాలి

ఎస్సీ సాంఘిక సంక్షేమ శాఖ ఆధ్వర్యంలో నడుస్తున్న హాస్టళ్లలో నెలకొన్న వివిధ సమస్యలను తక్షణమే పరిష్కరించి, హాస్టల్ ప్రవేశానికి దరఖాస్తు చేసుకున్న ప్రతి అర్హ విద్యార్థికి సీటు కేటాయించేలా ప్రభుత్వం, సంబంధిత అధికారులు చర్యలు తీసుకోవాలని విద్యార్థి సంఘాల నాయకులు డిమాండ్ చేశారు.

ఈ మేరకు ఎస్సీ సాంఘిక సంక్షేమ మరియు వెనుకబడిన తరగతుల సంక్షేమ శాఖ అధికారి శ్రీమతి నుషిత గారికి విద్యార్థి సంఘాల నాయకులు వినతిపత్రం అందజేశారు.

ఈ సందర్భంగా నాయకులు మాట్లాడుతూ, ప్రతి విద్యా సంవత్సరం హాస్టల్ సీట్ల కొరత కారణంగా పేద, గ్రామీణ మరియు వెనుకబడిన కుటుంబాలకు చెందిన అనేక మంది విద్యార్థులు విద్యకు దూరమయ్యే పరిస్థితి ఏర్పడుతోందన్నారు. ప్రభుత్వ విద్యను అభ్యసించే విద్యార్థులకు హాస్టల్ సౌకర్యం అత్యంత అవసరమని, అందువల్ల దరఖాస్తు చేసుకున్న ప్రతి అర్హ విద్యార్థికి హాస్టల్‌లో సీటు కేటాయించాలని కోరారు.

అలాగే హాస్టళ్లలో నాణ్యమైన ఆహారం, స్వచ్ఛమైన తాగునీరు, పరిశుభ్రమైన వసతి గదులు, మరుగుదొడ్లు, నిరంతర విద్యుత్, భద్రత, ఆరోగ్య సదుపాయాలు, అవసరమైన ఫర్నిచర్, పడకలు, అధ్యయనానికి అనుకూలమైన వాతావరణం వంటి మౌలిక సదుపాయాలను వెంటనే కల్పించాలని డిమాండ్ చేశారు.

విద్యార్థుల భవిష్యత్తును దృష్టిలో ఉంచుకొని అధికారులు సమస్యలను ప్రత్యక్షంగా పరిశీలించి, పెండింగ్‌లో ఉన్న దరఖాస్తులను త్వరగా పరిష్కరించి, ఒక్క అర్హ విద్యార్థి కూడా సీటు లేక ఇబ్బంది పడకుండా చర్యలు తీసుకోవాలని విజ్ఞప్తి చేశారు.

ఈ వినతిపత్రాన్ని సానుకూలంగా పరిశీలించి తక్షణ చర్యలు తీసుకుంటామని సంబంధిత అధికారి విద్యార్థి సంఘాల ప్రతినిధులకు హామీ ఇచ్చినట్లు నాయకులు తెలిపారు 

కార్యక్రమములో PDSU జిల్లా అధ్యక్షులు హాలింపాష, USFI రాష్ట్ర సహాయ కార్యదర్శి వామన్ పల్లి రంగస్వామి PDSU జిల్లా కార్యదర్శి హరీష్, AISF జిల్లా కార్యదర్శి ప్రవీణ్, TNSF రాష్ట్ర అధికార ప్రతినిధి సుభాన్ తదితరులు పాలుగోన్నారు