సూర్యాపేటలో ‘హాట్ టాపిక్’గా ఓ ఎమ్మార్వో తీరు అధికారం చేతిలో ఉంటే సరిపోతుందా... బాధ్యత మరిస్తే ఎలా?

సూర్యాపేటలో ‘హాట్ టాపిక్’గా ఓ ఎమ్మార్వో తీరు అధికారం చేతిలో ఉంటే సరిపోతుందా... బాధ్యత మరిస్తే ఎలా?
​అధికార ముద్ర పడితే చాలు... రోడ్లన్నీ తమవే అన్నట్లు కొందరు అధికారుల తీరు మారుతోంది. ప్రజాసేవ చేయాల్సిన స్థానంలో ఉండి, సమాజానికి ఆదర్శంగా నిలవాల్సిన ఒక రెవెన్యూ అధికారి (ఎమ్మార్వో) నడిరోడ్డుపై చేసిన వ్యవహారం ఇప్పుడు సూర్యాపేట జిల్లా కేంద్రంలో తీవ్ర చర్చనీయాంశంగా మారింది.
​అసలేం జరిగింది?
​సూర్యాపేట జిల్లా కేంద్రంలో ఒక కారు హల్‌చల్ చేసింది. పట్టణ పరిధిలోని రద్దీ రోడ్లపై పరిమితికి మించిన వేగంతో, ప్రమాదకరంగా (రాష్ డ్రైవింగ్) వెళ్తుండటంతో తోటి ప్రయాణికులు, స్థానికులు తీవ్ర ఇబ్బందులకు గురయ్యారు. బైక్‌పై వెళ్తున్న వారికి, బాటసారులకు ఏమాత్రం భద్రత లేని రీతిలో కారును దూకించుకుంటూ వెళ్లడంతో ఆందోళన వ్యక్తమైంది.
​అడిగితే బెదిరింపులు... పక్కన ఉన్న ప్రైవేటు వ్యక్తుల హంగామా!
​వాహనాన్ని అంత ప్రమాదకరంగా నడుపుతుండటంతో ఆందోళన చెందిన కొందరు ప్రయాణికులు, స్థానికులు ఆ కారును నిలదీశారు. బాధ్యతాయుతంగా నడపాలని మందలించబోతే... కారులో ఉన్న వ్యక్తుల నుండి అనూహ్య స్పందన ఎదురైంది.
​
కారులో పక్క సీట్లో కూర్చున్న వ్యక్తి వెంటనే కల్పించుకుని, "ముందు సీట్లో ఉన్నది ఎమ్మార్వో గారు... ఆయనతో పెట్టుకుంటే మీ అంతు చూస్తాం!" అంటూ ప్రయాణికులపై ఆగ్రహం వ్యక్తం చేస్తూ బెదిరింపులకు దిగారు.
​సైలెంట్‌గా అసలు ఎమ్మార్వో: పక్కన ఉన్న వ్యక్తి ‘నేనే ఎమ్మార్వో’ అని కలరింగ్ ఇస్తూ ప్రజలను భయభ్రాంతులకు గురిచేస్తుంటే... డ్రైవింగ్ సీట్లో ఉన్న అసలు ఎమ్మార్వో మాత్రం ఏమీ తెలియనట్లు మౌనంగా ఉండిపోవడం గమనార్హం.
​
విచారిస్తే తేలిందేంటంటే... ఆ కారును స్వయంగా ఎమ్మార్వోనే నడుపుతున్నారు. ఆయన పక్కన, వెనుక సీట్లలో ఉన్నదంతా జిల్లా కేంద్రంలో పాగా వేసిన కొందరు ప్రైవేటు వ్యక్తులు.
​
​ప్రజాసేవలో ఉండాల్సిన అధికారి ప్రైవేటు వ్యక్తులను పక్కన కూర్చోబెట్టుకుని, వీధుల్లో రాష్ డ్రైవింగ్ చేస్తూ ప్రజలను భయభ్రాంతులకు గురిచేయడంపై స్థానికులు తీవ్ర ఆగ్రహం వ్యక్తం చేస్తున్నారు. అధికారం చేతిలో ఉందని ప్రైవేటు వ్యక్తులను ప్రోత్సహిస్తూ, సామాన్య ప్రయాణికులను బెదిరించడం ఎంతవరకు సమంజసమని ప్రశ్నిస్తున్నారు.
​ఈ ఘటనపై ఉన్నతాధికారులు స్పందించి, ప్రజల ప్రాణాలతో చెలగాటమాడుతూ, బెదిరింపులకు దిగిన సదరు ఎమ్మార్వోపై మరియు ఆయనతో ఉన్న ప్రైవేటు వ్యక్తులపై చట్టరీత్యా కఠిన చర్యలు తీసుకోవాలని పట్టణ ప్రజలు డిమాండ్ చేస్తున్నారు.