అన్ని శాఖల సమన్వయంతో ఆపరేషన్ ముస్కాన్ -XI కార్యక్రమం ద్వారా జిల్లాలో 75 మంది బాలకార్మికులను సంరక్షించడం జరిగింది
18 సంవత్సరాల లోపు పిల్లలను పనిలో పెట్టుకుని వారితో పని చేయిస్తున్న వారిపై 18 కేసులు నమోదు.
బాల కార్మికుల సమాచారం తెలిస్తే వెంటనే పోలీసులకు సమాచారం అందించండి---------జిల్లా ఎస్పీ శ్రీ టి. శ్రీనివాస రావు, IPS
జోగులాంబ గద్వాల 1 ఆగస్టు 2025 తెలంగాణ వార్తా ప్రతినిధి : గద్వాల్ బాల కార్మిక వ్యవస్థను నిర్మూలించడానికి జులై నెలలో నిర్వహించిన ఆపరేషన్ ముష్కాన్-XI కార్యక్రమం ద్వారా అన్ని శాఖల సమన్వయంతో జిల్లాలో 75 మంది బాలకార్మికులను సంరక్షించడం జరిగిందని జిల్లా ఎస్పీ శ్రీ టి. శ్రీనివాస రావు, ఐపీఎస్ ఈరోజు ఒక ప్రకటనలో తెలిపారు. ఆపరేషన్ ముస్కాన్ కార్యక్రమాల ద్వారా తప్పిపోయిన పిల్లలతో పాటుగా , బాలకార్మికులుగా పనిచేస్తున్న చిన్నారులను గుర్తించి వారిని రక్షించి పునరావాసం కల్పించడం జరిగిందని తెలియజేశారు. చిన్నారులకు విముక్తి కల్పించడం కోసం పోలీస్ శాఖ,చైల్డ్ వెల్ఫేర్ కమిటీ,లేబర్ డిపార్ట్మెంట్, ఎడ్యుకేషన్ డిపార్ట్మెంట్ జిల్లా చైల్డ్ ప్రొటెక్షన్ డిపార్ట్మెంట్, వివిధ డిపార్ట్మెంటు అధికారులతో జిల్లాలో టీమ్ లుగా ఏర్పాటు చేసి ప్రభుత్వేతర స్వచ్చంద సంస్థల సహకారంతో విస్తృతంగా తనిఖీలు నిర్వహించడం జరిగిందని, ఈ సంవత్సరం జులై 1 నుండి 31 వరకు నిర్వహించిన ఆపరేషన్ ముస్కాన్ కార్యక్రమాలో జిల్లా వ్యాప్తంగా 75( బాలలు -66, బాలికలు-9) మంది చిన్నారులను గుర్తించి వారి యొక్క తల్లిదండ్రుల వద్దకు చేర్చడం జరిగిందని అందులో 8 మంది బాల కార్మికులకు విముక్తి కల్పించి వారిని చదువుకోవటానికి తిరిగి పాఠశాలలో చేర్పించటం జరిగిందని, మిగిలిన వారిని cwc ఆధ్వర్యంలో వారి తల్లిదండ్రులకు అప్పగించి కౌన్సిలింగ్ చేయడం జరిగిందని అన్నారు. 18 సంవత్సరాలలోపు పిల్లలను పనిలో పెట్టుకుని వారితో పని చేయించిన వారిపై 18 కేసులు నమోదు చేయడం జరిగిందని ఎస్పీ తెలిపారు.
బాలల హక్కులను కాపాడాల్సిన బాధ్యత మానందరిపైనా ఉన్నదని,బాల కార్మిక వ్యవస్థ నిర్ములన కోసం బాధ్యతాయుతంగా కృషి చేయాలని కోరారు.తరుచు బాలల చేత పనులు చేయిస్తున్న వారిని గుర్తించి వారిపై కేసులు నమోదు చేయడం జరుగుతుందన్నారు.వీధి బాలలను, బాల కార్మికులను చూసినప్పుడు, డయల్- 100 లేదా 1098 లేదా స్థానిక పోలీస్ వారికి సమాచారం అందించాలని జిల్లా ఎస్పీ ప్రజలకు సూచించారు.
