ప్రజాస్వామ్య పరిరక్షణకు కాంగ్రెస్ కార్యకర్తలు పోరాడాలి: అలంపూర్ మాజీ ఎమ్మెల్యే సంపత్ కుమార్ పిలుపు

జోగులాంబ గద్వాల 17 జూన్ 2026 తెలంగాణవార్త ప్రతినిధి:- భారతీయ జనతా పార్టీ (బీజేపీ), భారత్ రాష్ట్ర సమితి (బీఆర్ఎస్) లు అధికారంలోకి రావడానికి రాజ్యాంగ విరుద్ధమైన విధానాలకు పాల్పడుతూ ప్రజాస్వామ్యాన్ని బలహీనపరిచే ప్రయత్నాలు చేస్తున్నాయని అఖిల భారత కాంగ్రెస్ కమిటీ (ఏఐసీసీ) కార్యదర్శి, ఛత్తీస్‌గఢ్ రాష్ట్ర పర్యవేక్షకుడు, అలంపూర్ మాజీ శాసనసభ్యుడు (ఎమ్మెల్యే) డాక్టర్ ఎస్.ఏ. సంపత్ కుమార్ తీవ్రంగా విమర్శించారు. జోగులాంబ గద్వాల జిల్లా అలంపూర్ నియోజకవర్గ పరిధిలోని అయిజ పట్టణ కేంద్రంలో గల శ్రీకృష్ణ కల్యాణ మండపంలో (ఫంక్షన్ హాల్) బుధవారం కాంగ్రెస్ పార్టీ ఆధ్వర్యంలో బూత్ స్థాయి ఏజెంట్లకు (బీఎల్ఏ) ప్రత్యేక అవగాహన శిక్షణ శిబిరం నిర్వహించారు. నియోజకవర్గంలోని 291 పోలింగ్ బూత్ ఏజెంట్లకు ఓటర్ల జాబితా ప్రత్యేక సమగ్ర సవరణ (ఎస్ఐఆర్) ప్రక్రియపై ఈ సందర్భంగా శిక్షణ ఇచ్చారు.

ఈ కార్యక్రమానికి ముఖ్య అతిథిగా విచ్చేశారు సంపత్ కుమార్. ఈ సందర్భంగా ఆయన మాట్లాడుతూ ఓటు హక్కు పరిరక్షణే కాంగ్రెస్ పార్టీ ప్రధాన లక్ష్యమని, ప్రతి కాంగ్రెస్ కార్యకర్త ఓటు హక్కు రక్షణ కోసం పోరాడాలని పిలుపునిచ్చారు. సమగ్ర సవరణ ప్రక్రియ పేరుతో ప్రజల ఓటు హక్కును దెబ్బతీసే కుట్రలకు కాంగ్రెస్ పార్టీ గట్టిగా ఎదురొడ్డి నిలుస్తుందన్నారు. ప్రధాన శిక్షకుడు కేతూరి వెంకటేష్ మరియు వారి బృందం ఆధ్వర్యంలో ఈ శిక్షణ సాగింది. కొత్త ఓటర్లను నమోదు చేయడం, మరణించిన లేదా స్థానికంగా నివాసం ఉండని వారి ఓట్లను నిబంధనల ప్రకారం తొలగించే అంశాలపై ఏజెంట్లకు క్షుణ్ణంగా వివరించారు. అలాగే బూత్ స్థాయి ఏజెంట్ల విధులు, బాధ్యతలు మరియు వారి హక్కుల గురించి శిక్షకులు క్లుప్తంగా అవగాహన కల్పించారు. ఈ అవగాహన శిక్షణ కార్యక్రమంలో కాంగ్రెస్ పార్టీ జిల్లా అధ్యక్షుడు రాజీవ్ రెడ్డి, జిల్లా గ్రంథాలయ సంస్థ చైర్మన్ నీలి శ్రీనివాసులు, మార్కెట్ యార్డ్ చైర్మన్ దొడ్డప్ప, వైస్ చైర్మన్ కుమార్, కొల్లాపూర్ నియోజకవర్గ ఇన్‌చార్జ్ మరియు రాష్ట్ర అధికార ప్రతినిధి మాస్టర్ షేక్షావలి ఆచారి, సింగిల్ విండో చైర్మన్ పోతుల మధుసూదన్ రెడ్డి, జిల్లా కాంగ్రెస్ కమిటీ (డీసీసీ) ప్రధాన కార్యదర్శి సంకాపురం రాముడు, కిసాన్ సెల్ జిల్లా అధ్యక్షుడు నాగరాజు, స్థానిక మున్సిపల్ కౌన్సిలర్లు, సర్పంచులు, మాజీ కౌన్సిలర్లు, వివిధ మండలాల అధ్యక్షులు, పార్టీ సీనియర్ నాయకులు, కార్యకర్తలు మరియు నియోజకవర్గ వ్యాప్తంగా వచ్చిన బూత్ స్థాయి ఏజెంట్లు పెద్ద సంఖ్యలో పాల్గొన్నారు.